يا حلو معنى الطفولة
بيتنا من غير يهال ما يسوى شي :(
مافيه حشرة ولا حركة ولا دماار بالأثاث
ولا حتى شخبطة عالجدار كل شي مرتب بمكانه
ما عندي حد أصارخ عليه يوم يبهدل غرفتي يعبث بإكسسواراتي وجنطي
يوقف صوب المكتبة ويطلع الكتب والنوت ويقصصهن
كل شي مرتب، ودي أسمع صوت يهال
....
من فترة كانت أختي راقده عندنا وأنا راقده معاها بالغرفة
يوم رجعت بيتها ما عرفت أرقد فليل
نشيت بعز الليل ، وأقول بخاطري وينج يا حمدونه
صج ماشاء الله عليها حشرة وما تخليني أرقد زين
لكن كنت أحس بشي يفرحني
أنش الليل بوقت حشرتها وأطالعها وتطالعني تيلس تتبسم وتتقلب وتسوي حركات عفوية
....
عبدالرحمن و عبدالرحمن
:D
ثنتين من خواتي عندهن ولد ومسمينهم بنفس الاسم
عبدالرحمن ولد اختي الكبيرة عمره ألحينه سنة وخمسة أيام
من جريب بدى يمشي
ويا حلاااته ياربي ويا ضروساته جنه أرنوب
من ندق دقه عالطاولة نشوف الولد يبدى يرقص
بذاك اليوم شفته وهو يمشي في الحوي ويلحق الكرة فناديته اطالعني عطيته بوسه من بعيد الحبيب طلع يعرف يطرش بوسات بالهوا
q:
عبدالرحمن الثاني
عمره 9 شهور
بعده يحبي فيه برااااااااااااااءة غير طبيعية
حجمه وشكله ملامحه
خبااال هالولد
من نشله على طول يحضنا
لكن ياما تحت السواهي دواهي
من يحضنا يقرصنا برقبتنا
وصراحهـ، أتوقع إنه بيصير لاعب كرة قدم أو شخصية رياضيه
ماشاء الله عليه إنسان حركي رغم إنه بعده ما مشى
....
عبادي وخليفه
هذيلا توم وجيري
نكته هالولدين
عبادي اخو حمني ولد اختي الكبيرة
وخليفة اخو حمني الثاني
نقولكم عن سوالفهم
عاد هم سبب دمار غرفتي وبهدلتها
مو غرفتي وبس إلا البيت بكبره
المشكلة خلوف مستوي زعيم عبادي هو يتأمر وعبادي عليه التنفيذ
مرة كنا عالريوق، ويالسه أنرفز بعبادي وأسوي له حركات تقهره ما شفت منه تجاوب صديت لخلوف
ويلست أطالعه بنظرات وأسوي له حركات وشوي أشل عنه كوب الحليب الحبيب قال لعبادي :
عبادي أضربها
وشوي أحصل حد جدامي قلت له خير؟!
وطراخ وطيخ بهدلوني بالجبن
هذي يزاتي يا عيال خواتي
على فكرة عبادي وخلافي عمرهم 3 سنوات ^_^
من جم يوم كنت آكل آيس كريم
فدخل عبادي ومعاه خلافي
خلافي شافني آكل آيس كريم ولا نحصل الولد تجرب مني وطاخ على ركبتي
أطالتعه وأنا أضحك قلت لييش تضرب خالوه؟
ما رد ناد على عبادي قاله تعال أضربها
شنوا هجوم علي
أما عبادي
إنسان خجول نوعاً ما
حبووووب + عسووول
هالإسبوع رقدوا عندنا إسبوع كامل لأنه أختي مسويه عمليه فالحبيب كل ليلة عنده طقس لازم سالفة الهونجا هونج
يوقف بممر الصالة يحط فباله شخص معين وأكثر شي يكون فباله أمي وينط عليها
مرة، كان الأخ يسوي هالحركة وأمي يالسه بعيد فجنه حطني فباله
ولا نسمع هونجااا هونجاااا هونجااا هونجااا وجمني أخوه يمشي له يبا يوقف جدامه
سحبه عبادي وهو يتأمر عليه أوقف هني وثوف
... قصده شوف...
وعاد الكلام هونجااا هونجااا هونجاا هونجاا ويركض وينط علي
يوم الثلاثا الظهر رجعت من الكلية فدخلت غرفة الطعام لأني سمعت حشرة اليهال هناك، شليت حمدونه ويلست ألعبها شوي يعني واحد واحد
وعبادي منخش ورا الطاولة فما شفته لكن وأنا طالعه أسمع صوت وراي يقول : أنا أنا أنا يوم صديت أشوف عبادي فاتح إيدينه من وقفت يقولي شليني
*شكل الحبيب توله عالشل*
....
مريوم
عمرها5 سنوات
اممم، حليلها ربي يعينها يوم تيي بيتنا وما تحصل بنت اخوي مراوي غصبا عنها تلعب مع الأولاد مالها غيرهم
طبعاً هي نسخه مني وأنا صغييرة وهالشي مونسني، البارحه كسرت خاطري بنت خالي اللي أكبر عنها بـ3 سنوات كانت مسويه فعالية فبيتهم يعني مسابقات وحفلة ، فيوم رجعت مريوم عالساعه 11 فليل شفتها شاله كيس شكبره قلت يحليلها شروقي متعبة عمرها
فجيت الكيس طلعت الكرتون حوض سباحه من النوع الزيين والغالي قلت لها وفرت على أمج كانت بتشتري لكم واحد منه
لكن وشوي يدخل أخوي أحمد يقولها ترى شروقي قاصه علييج مافيه حوض سباحه ويلس يبطلها
أما مقلت لزيييز
* مسطرة صغيرة ولعبة أصغر *
داخل كرتون شكبره يتني ضحكه بس سكتت مافيني أخاف لا تصيح من صدمتها الحبيبة
مرات اتيني تقولي أنا أشبهج؟
أقولها شرايج أنتي؟! شكلها مب مصدقه
....
مروة ومها
بنات أخوي
مروة رغم صغر سنها لكن ماشاء الله عليها حركاتها وتصرفاتها أكبر عن عمرها
عمرها 4 سنوات ومها 3 سنوات
مروة، مرة كانت فالمستشفى مع أمي فيلست البنت ترمس مع الأوادم في المستشفى وأمي تناديها تقولها مروة يلسي وأسكتي
تقول لأمي: امايه لا تخافين عاادي
موقف عيبني
مرة نزلت بيتنا بعد ما رجعت من الروضه عالظهر أبوها ياب مهاوي عندنا فمن شافت مروة مها على طول تنش وتركض صوب مها
وتحضنها الصراحه موقف مؤثر بغيت أبجي
وموقف ثاني، كانت مهاوي مسويه شي ضحكنا مسكتها مروة ويلست تقول لنا مهوي سوت جذي ولا شوي تقول
ماشاء الله عليها
أنا وأختي اطالعنا بعض وابتسمنا ابتسامة علايضه ورددنا وراها ماشاء الله عليهااا
مهوي بعد إنسانة هاديه ما ترضى ترمس إلا يوم يدق فبالها
....
سلطان وحمود
دوم ضرابة
ولازم أدخل واتضارب معاهم يوم يتضاربون
أدخل بينهم عسب أهديها إلا أزيد الطين بلة
هم اللي يطيحون فيني بدل لا يطيحون فبعض طبعاً بعد المعركة أطلع متكسرة
حمود
هالإنسان رغم إني أضربه واايد يوم أتنرفز لكن يوم نسأله تحب منو أكثر شي يأشر علي
على قولته أحبج كثر الشلك اللي ننقعه بالعيد
طلع الحب جليل مب وايد
سلطان دومه ضدي
أقوله سو جذي يسوي عكس اللي أطلبه لكن ماشاء الله عنده موهبة بالتصوير رغم صغر سنة
....
آخر شي أخوي أحمد
آخر العنقود
حبيبي الصغير
صج إنه لسانه طويل شوي لكن أتحمله آخر العنقوود
أكثر شي يضحكني فيه يوم يتحرطم
البارحه كان يبا الكمبيوتر وأنا أشتغل على شي فأقوله أنطر عشر دقايق وبخلص
جان يتساند عالكرسي ويقول
شو إنتي تيلسين واايد وكبتج مليانه ملابس
ضحكتني العبارة، قلت له الله يخلي كبتك، وبعدين شو يخص كبتي وملابسي بالكمبيوتر؟!
ضحك معاي وطلع برا الغرفه شكله راح يعد ملابسة
....
بالنهاية
ما عددت اليهال ولا كتبت سوالفهم إلا لشي واحد
قال تعالى:
" المال والبنون زينة الحياة الدنيا"
صدق الله العظيم
مونه
posted by مونه @ 5:55 PM
4 Comments:
ماشاء الله تبارك الله
الله يحفظهم ويخليهم لكم...ويزيدهم
ويطرح البركة فيهم
عقبال ما أشوف @_@ عيالك
أختك سوسو
^_^
ماشاء الله تبارك الله
الله يحفظهم ويخليهم لكم...ويزيدهم
ويطرح البركة فيهم
عقبال ما أشوف @_@ عيالك
أختك سوسو
^_^
إن شاء الله :)
يسلموو على ردج ;)
السلام عليكم ...
عجبتني ردودكم وااايد
سبحان الله في ناس ماتحب الحشر الانه عندهم يهال والنصف الثاني نفسه يسمع صوته بس ....
ولكن كل نعمه من الله ..
عندي انا احب الهدوء واحب الحشر بعد ... بس كل شي له وقته
Post a Comment
<< Home